කැලණිය, සපුගස්කන්ද තෙල් පිරිපහදු පරිශ්‍රයෙන් කොරෝනා ආසාදිතයින් 550කට අධික සංඛ්‍යාවක් හඳුනාගත් බව ගම්පහ පරිපාලන මහජන සෞඛ්‍ය පරීක්ෂක එච්.බී. ගුණතිලක මහතා පවසයි.
සපුගස්කන්ද තෙල් පිරිපහදුවේ අහඹු ලෙස තෝරා ගත් සේවකයින් 50 දෙනෙකු පමණ පසුගිය සතියේ පී.සී.ආර්. පරීක්ෂණ සඳහා යොමු කර ඇති අතර එහිදී ආසාදිතයින් 40 දෙනෙකු පමණ හඳුනාගෙන තිබේ.
ඉන්පසුව යළිත් පසුගිය සිකුරාදා 800කට අධික සේවකයන් පිරිසක් පී.සී.ආර්. පරීක්ෂණ සඳහා යොමු කර ඇති අතර ඉන් 550කට අධික පිරිසකට කොරෝනාවෛරසය ආසාදනය වී ඇතැයි තහවුරු වූ බව පරිපාලන මහජන සෞඛ්‍ය පරීක්ෂකවරයා පැවසීය.
හඳුනාගත් ආසාදිතයින් මේ වන විට ප්‍රතිකාර සඳහා රෝහල්ගත කිරීමටත් ඔවුන්ගේ පළමු පෙළ ආශ්‍රිතයන් නිරෝධායනයට ලක් කිරීමටත් ප්‍රදේශය භාර මහජන සෞඛ්‍ය පරීක්ෂකවරුන් කටයුතු කරමින් පවතින බව ඒ මහතා ප්‍රකාශ කළේය.
සපුගස්කන්ද තෙල් පිරිපහදුවේ සේවය සඳහා දිවයිනේ සෑම ප්‍රදේශයකින් ම සේවකයන් පැමිණෙන බැවින් සමස්ත කාර්ය මණ්ඩලය ම පී.සී.ආර්. පරීක්ෂණ සඳහා යොමු කිරීමට සෞඛ්‍ය බලධාරීන් තීරණය කර තිබේ.
වෛරසය සේවකයන් අතර පැතිර ගිය ආකාරය නිශ්චිතව හඳුනා ගැනීම සඳහා මේ වන විට පරීක්ෂණ ආරම්භ කර ඇති බව ද පරිපාලන මහජන සෞඛ්‍ය පරීක්ෂකවරයා වැඩිදුරටත් පැවසීය.
Discussion about this post