නව පළාත් සභා මැතිවරණ පනතක් සම්මත කිරීමෙන් පසුව පළාත් සභා මැතිවරණය පවත්වන බව සම කැබිනට් ප්‍රකාශක අමාත්‍ය උදය ගම්මන්පිල්ල මහතා පවසයි.
රජයේ ප්‍රවෘත්ති දෙපාර්තමේන්තුවේදී අද (30) පැවති කැබිනට් තීරණ දැනුම් දීමේ මාධ්‍ය හමුවේදී මාධ්‍යවේදියෙකු යොමු කළ පැනයකට පිළිතුරු දෙමින් අමාත්‍යවරයා මේ බව ප්‍රකාශ කළේය.
අමාත්‍යවරයා වැඩිදුරටත් සඳහන් කළේ, පළාත් සභා මැතිවරණය පැවැත්වීමේ දින සම්බන්ධයෙන් කිසිදු සාකච්ඡාවක් නොපැවත්වුණු බවය.
පළාත් සභා මැතිවරණ ක්රමය සංශෝධනය කිරීම සඳහා කෙටුම්පතක් ඊයේ (29) අමාත්‍ය මණ්ඩලයට ඉදිරිපත් කෙරිණි.
සංශෝධනය කළ පනත් කෙටුම්පතේ යෝජනාව අමාත්‍යවරයා මෙසේ පැහැදිලි කළේය.
“ස්ථාවර පළාත් සභාවක් පිහිටුවා ගැනීම සඳහා දැනට පළාතේ වැඩි ම ඡන්ද සංඛ්‍යාවක් ලැබෙන පක්ෂයට ලබා දෙන ප්‍රසාද මන්ත්‍රී ධුර දෙක පළාතේ පවතින එක දිස්ත්‍රික්කයට දෙක බැගින් ඉහළ නැංවීමට යෝජනා කෙරෙනවා. ඒ අනුව දිස්ත්‍රික්ක තුනක් තියෙන බස්නාහිර පළාතට ප්‍රසාද මන්ත්‍රී ධූර දෙකක් වෙනුවට 6ක් හිමි වෙනවා. දිස්ත්‍රික්ක දෙකක් තියෙන උතුරු මැද පළාත් සභාවට ප්‍රසාද මන්ත්‍රී ධූර දෙකක් වෙනුවට 4ක් හිමි වෙනවා. ඒ හරහා ස්ථාවර පළාත් සභාවක් ගොඩනැගීමට හැකි වෙනවා. ඒ අනුව ස්ථාවර පළාත් සභාවක් ගොඩ නැගීමත් ප්‍රදේශයට වග කියන මන්ත්‍රීවරයෙකු සිටීමත් කියන කාරණා දෙක ම ඉටු කර ගැනීම සදහා මන්ත්‍රීවරුන්ගෙන් 70%ක් කොට්ඨාස ක්‍රමයටත් 30%ක් සමානුපාතික ක්‍රමයටත් තෝරා ගැනීමට මෙම පනත් කෙටුම්පතේ යෝජනා කර තබෙනවා.”
Discussion about this post