තාක්ෂණ ලෝකයේ අයට නම් පුදුම හිතෙන දෙයක් අද සිද්ද වුනා. බොහෝ දෙනා හඳුන්වන විදියට පරණ තරහාකාරයෝ දෙන්නෙක් අද බොහොම සමීප මිතුරන් වුනා. ඒ ලිනක්ස් සහ මයික්‍රොසොෆ්ට් සමාගම!
‘‘මේකෙන් ඔයාලා පුදුම වේවි. හැබැයි මේක එකසැරේ වුන දෙයක් නෙවෙයි‘‘ යනුවෙන් ලිනක්ස් පදනමේ විධායක අධ්‍යක්ෂ ජිම් සෙම්ලින් මයික්‍රොසොෆ්ට් සහ ලිනක්ස් අතර ඉතිහාසය ගැන පැහැදිලි කරමින් මාධ්‍යයට අදහස් දැක්වුවා.
මයික්‍රොසොෆ්ට් සමාගමේ ප්‍ර‍ධාන විධායක නිළධාරි සත්‍ය නඩාල්ගේ මඟපෙන්වීම සමඟ මයික්‍රොසොෆ්ට් සමාගම විවෘත මූලාශ්‍ර(open source) ආශ්‍රිත බොහෝ දෑ සිදුකරනවා. පසුගිය වසර කීපය තුළදී කැනොනිකල් සමාගමේ උබුන්ටු හි ඇතැම් දේ වින්ඩෝස් 10 වෙතට අරගෙන ආවා හැමෝම දන්නා කරුණක්. එවගේම මයික්‍රොසොෆ්ට් SQL Server මෘදුකාංගයේ ලිනක්ස් වෙනුවෙන් නිර්මාණය කරන ලද සංස්කරණයද නිකුත් කලා. එවගේම මයික්‍රොසොෆ්ට් .NET හි ඇතැම් දෑ Red Hat ඇතුලු සමාගම් කීපයක් සමඟ එකතුවි දියුණූ කරමින් යනවා.
එපමණක් නොව, මයික්‍රොසොෆ්ට් සමාගම Node.js, OpenDaylight, Open Container Initiative, R Consortium සහ Open API Initiative වැනි ලිනක්ස් පදනම මඟින් ක්‍රියාත්මක කරන ව්‍යාපෘති රැසකට දායක වූ බවද සෙම්ලින් මෙහිදී පවසා සිටියේ බොහෝ දෙනා නොදන්න කරුණක් හෙළි කරමින්.
මයික්‍රොසොෆ්ට් සමාගම ලිනක්ස් පදනමේ වැඩිම මූල්‍ය දායකත්වයක් ලබාදෙන ප්ලැටිනම් සාමාජිකයෙකු ලෙස තමයි එකතුවෙන්නේ. ගූගල් සමාගම සාමාජිකයෙකු වී සිටින්නේ ගෝල්ඩ් සාමාජිකයෙකු ලෙසටයි.
Discussion about this post