මීට දින කීපයකට පෙර එළිදැක්වුණ Meizu සමාගමේ අලුත්ම දුරකථනය චීනයේ පාරිභෝගිකයන්ට මිළදීගැනීම සඳහා දොර විවෘත කරනු ලැබුවා. මෙය මිළදී ගන්නට අවශ්‍ය නම් අදාල පාරිභෝගිකයන් හට පළමුව ඒ සඳහා ලියාපදිංචි වී සිටිය යුතු වෙනවා. ලියාපදිංචිය සඳහා විවෘත කර පැය 24ක් ගතවන තැන මිලියන 4.3කට අධික ගැනුම්කරුවන් පිරිසක් ලියාපදිංචි වී තිබෙන බව මෙයිසු සමාගම දැනුම්දී සිටිනවා.
ඇමරිකානු ඩොලර් 105 සිට(රුපියල් 16,000පමණ සිට) විකිනීමට තිබෙන මෙයිසු එම්5 දුරකථනයට 2.5D වක්‍ර වීදුරුවක් සහිත අඟල් 5.2ක 720p ඩිස්ප්ලේ එකක් තිබෙනවා. MediaTek MT6750 ප්‍රොසෙසරයක් සහ ගිගාබයිට් 2ක රැම් මතකයක් 16GB අභ්‍යන්තර මතකයක් තිබෙන සංස්කරණයක්ද, 3GB RAM එකක් සහිතව ගිගාබයිට් 32ක අභ්‍යන්තර මතකයක් සහිත තවත් සංස්කරණයක්ද මේ දුරකථනයේ තිබෙනවා.
පසුපස කැමරාව මෙගාපික්සල් 13ක් වන අතර ඉදිරිපස මෙගාපික්සල් 5ක් තිබෙනවා. ඡායාරූප ගැනීමේදී ඉක්මනින් ෆෝකස් කරගැනීම සඳහා ෆේස් ඩිටෙක්ෂන් ඔටෝ ෆෝකස් තාක්ෂණයද තිබෙනවා.
Matte Black, Mint Green, Blue, Champagne Gold සහ White යන වර්ණ 5කින් පැමිණෙන මෙහි පළමු වර්ණ දෙකේ විශේෂත්වයක් තිබෙනවා. මැට් බ්ලැක් සංස්කරණයේදී ඇඟිලි සලකුණු පාරවල් දුරකථනයේ කවරයේ සටහන් වන්නේ නෑ. එවගේම එය සීරීම් වලටත් ඔරොත්තු දෙන බවයි ඔවුන් පවසන්නෙ. මින්ට් ග්‍රීන් සංස්කරණයේ පාර්ජම්බුල ආලේපනයක් තිබෙන බැවින් එහි වර්ණය කාලයක් යනකොට අවපැහැ ගැන්වීමෙන් වැලකෙනවා.
මේ කෙසේ වූවත්, මිලියන 4ක් දුරකථනය වෙනුවෙන් ලියාපදිංචි වුවාට ඇත්තටම මිළදී ගන්නේ මෙයින් යම් කොටසක් පමණක් බව කියන්න ඕන.
Discussion about this post