iOS 14, iPadOS 14 සහ watchOS 7 නිකුත් කෙරේ

ඇපල් සමාගමේ නවතම මෙහෙයුම් පද්ධති තුනම මේ වන විට ඔබේ ඇපල් උපාංගය වෙත ස්ථාපනය කිරීමට හැකියාව තිබෙනවා. ඒ, ඇපල් සමාගම පසුගියදා එය නිළ වශයෙන් ඕනෑම කෙනෙකුට ලබාගත හැකි ලෙස නිකුත් කිරීමත් සමගයි. මාස ගණනක පරීක්ෂණ හා අඩුපාඩු නිවැරදි කිරීමෙන් පසු ඔවුන් එය මෙලෙස නිකුත් කලා.

අලුත් අයිඕඑස් 14 සඳහා මෙතෙක් නොතිබූ විශේෂාංග රැසක් එකතු කර තිබෙනවා. Home screen widgets, App Library, Apple Clips, picture-in-picture mode මෙහිදී කැපී පෙනෙන අංග ලෙස සඳහන් කරන්න පුලුවන්. Siri සහ Messages වලද වෙනස්කම් රැසක් ඔවුන් සිදුකර තිබෙනවා. 2015දී නිකුත්කල iPhone 6s වැනි පැරණි දුරකථන දක්වාම අලුත් iOS 14 ස්ථාපනය කිරීමට හැකිවීමත් විශේෂත්වයක්. iPad සඳහාද එම විශේෂාංග වලටම අමතරව, Apple Pencil එක භාවිතයෙන්, ඩිස්ප්ලේ එකේ ඕනෑම තැනක ලිවීමේ හැකියාවද ලැබෙනවා. අලුත් Watch faces රැසක් සහ බොහෝ දෙනෙක්ට අවශ්‍යව තිබූ තමාගේ නින්ද ගැන දත්ත පෙන්වීමද මෙයට එකතු කර තිබෙනවා. මේ දිනවල බොහෝවිට අවධානයෙන් සිදුකරන අත් සේදීම අලුත් WatchOS එක තිබෙන Apple Watch වලට හඳුනාගැනීමටත් පුලුවන්. එවිට, Apple Watch එක මත තත්පර 20ක් පෙන්වනු ලබන අතර තමන්ට තත්පර 20 සිතාගැනීමට නොහැකියි නම් මෙය ඉතාම හොඳ විශේෂාංගයක් විදියට කියන්න පුලුවන්.