කොවිඩ් වෛරසයේ මූලික රෝග ලක්ෂණ තවත් විකෘති වෙයි

කොරෝනාවෛරසය ආසාදනය වීමෙන් පසු ඇති වන රෝග ලක්ෂණ අතරට නවතම රෝග ලක්ෂණයක් මතු වී ඇතැයි වෛරස් රෝග විශේෂඥයෝ පෙන්වා දෙති.

මෙම නවතම රෝග ලක්ෂණය වන්නේ, මුඛය තුළ සහ දිව මත ඝන බිබිලි හට ගැනීමය.

මෙම රෝග ලක්ෂණය ‘COVID Tongue’ ලෙස හඳුන්වා තිබේ.

කොරෝනාවෛරසය විවිධ ප්‍රභේදයන්ට වෙනස් වීමත් සමග එහි රෝග ලක්ෂණ ද වෙනස් වෙමින් පවතින බව විශේෂඥයින්ගේ මතයයි.

කිංග්ස් ලන්ඩන් කොලේජ්හි වසංගත රෝග විද්‍යාඥයෙකු වන මහාචාර්ය ටිම් ස්පෙක්ටර් සිය ට්විටර් ගිණුමේ සටහනක් තබමින් පවසා ඇත්තේ, කොරෝනාවෛරසය ආසාදනය වූවන්ට කොවිඩ් ටං තත්ත්වය සහ මුඛයේ තුවාල හට ගැනීමේ රෝග ලක්ෂණ පෙන්නුම් කිරීම ඉහළ යමින් පවතින බවය.

ඔහු ඉල්ලා සිටින්නේ, හිසරදය හෝ තෙහෙට්ටුව වැනි සුළු රෝග ලක්ෂණයක් පැවතිය ද නිවසට වී හුදෙකලාව වාසය කරන ලෙසය.

නව රෝග ලක්ෂණයක් වන දිවෙහි ඇති වන තුවාල සහ බිබිලි සතියක පමණ කාලයකට පසු සුව වන බව ද පැවසේ.

කෙසේ වෙතත්, එම රෝගී තත්ත්වය පවතින කාල සීමාව තුළ ආසාදිතයින්ට රස දැනීම සහ සුවඳ දැනීම අඩු වන බවට නිරීක්ෂණය කර තිබේ.

කෙසේ වෙතත්, මේ සම්බන්ධයෙන් ලෝක සෞඛ්‍ය සංවිධානය මෙතෙක් නිල ප්‍රකාශයක් නිකුත් කර නොමැති අතර නව රෝග ලක්ෂණය සම්බන්ධයෙන් නිශ්චිත විශ්ලේෂණයක් කළ යුතු බව විශේෂඥයින්ගේ අදහසයි.

මෙවැනි රෝග ලක්ෂණ සහිත ආසාදිතයින් ශ්‍රී ලංකාවෙන් හමුවී ඇද්ද යන්න පිළිබඳව විමසූ අවස්ථාවේ වසංගත රෝග විද්‍යා ඒකකයේ අධ්‍යක්ෂ වෛද්‍ය සුදත් සමරවීර මහතා ප්‍රකාශ කළේ, එවැන්නක් වාර්තා වී නොමැති බවය.

කොළඹ මහ නගර සභාවේ වසංගත රෝග විද්‍යාඥ වෛද්‍ය දිනුකා ගුරුගේ මහත්මිය ද සඳහන් කළේ, මෙතෙක් එවැනි රෝග ලක්ෂණ සහිත ආසාදිතයෙකු හමු වී නොමැති බවය.

කොවිඩ්-19 රෝගයට අදාළව මේ වන විට නිශ්චිතව හඳුනාගෙන ඇති රෝග ලක්ෂණ මෙසේය.

1. උණ/ ශරීර උෂ්ණත්වය ඉහළ යාම

2. වියළි කැස්ස

3. උගුරේ වේදනාව

4. නාසය බර ස්වභාවය

5. හුස්ම ගැනීමේ අපහසුතාව

6. පපුවේ වේදනාව