කිසියම් පිරිසක් විසින් තමන්ව පැහැරගෙන ගොස් හිරිහැර කළ බවට අසත්‍ය පැමිණිල්ලක් සිදුකළේ යැයි චෝදනා එල්ල වී සිටින කොළඹ, ස්විස්ටර්ලන්ත තානාපති කාර්යාල නිලධාරිනී ගානියා බැනිස්ටර් ෆ්‍රැන්සිස් යන අයට අද (9) කොළඹ මහාධිකරණය හමුවේ අධිචෝදනා පත්‍ර භාර දෙනු ලැබීය.
අදාළ නඩුව අද කැඳවනු ලැබූ අවස්ථාවේදී විත්තිකාර ගානියා බැනිස්ටර් ෆ්‍රැන්සිස් යන අය අධිකරණය හමුවේ පෙනී සිටියා ය.
ඉන් අනතුරුව නීතිපතිවරයා විසින් ගොනුකර තිබූ අධිචෝදනා පත්‍ර විත්තිකාරියට භාරදීම සිදු කෙරිණි.
පසුව විත්තිකාරිය පෙර ඇප මත මුදා හැරීමටත් අධිකරණය නියෝග කළ අතර නඩුව ජුනි මස 4 වන දා කැඳවීමට ද අධිකරණය නියම කළේ ය.
එමෙන් ම, එදින විත්තිකාරියට අධිචෝදනා පත්‍ර කියවා දී නඩු විභාගය සඳහා දින නියම කිරීමට නියමිතය.
2019 වසරේ නොවැම්බර් මස තමන්ව කිසියම් පිරිසක් විසින් පැහැරගෙන ගොස් හිරිහැර කළ බවට අසත්‍ය පැමිණිල්ලක් අපරාධ පරීක්ෂණ දෙපාර්තමේන්තුව වෙත සිදුකළ බවට චෝදනා කරමින් එම විත්තිකාරියට එරෙහිව නීතිපතිවරයා විසින් මෙම නඩුව ගොනු කර තිබේ.
Discussion about this post