ලෝක සෞඛ්‍ය සංවිධානය විසින් පසුගිය වසරේ(2015) ලොව සෑම රටක්ම අරගෙන සමීක්ෂණයක් සිදුකලා. ඒ එක් එක් රටවල් වල මිනිසුන්ගේ සාමාන්‍ය ආයු කාලය සෙවීමට. ලෝකයේම මිනිසුන්ගේ සාමාන්‍ය අගය ගහතොත් මිනිසෙකු වසර 71.4ක් ජීවත් වනවා. එක් එක් රටවල ආයු කාලය මැනීම සඳහා රෝග, මානසික සෞඛ්‍ය, අපයෝජනයන්ට බඳුන්වීම, ප්‍ර‍චණ්ඩත්වය, පෝෂණය, පානීය ජලය, මාර්ග අනතුරු, ලිංගික හා ප්‍ර‍ජනන සෞඛ්‍ය, පරිසර දූෂණය, එන්නත් වැනි දර්ශක සලකා බැලෙනවා.
ඒ විතරක් නෙවෙයි. ස්ත්‍රී-පුරුෂ භාවයත් මෙහිදි සැලකිල්ලට ගනු ලබනවා. ලෝකයම ගත්කල ස්ත්‍රී පාර්ශවය වසර 73ක සාමාන්‍ය ආයු කාලයකට හිමිකම් කියන අතර පිරිමින්ට තිබෙන්නේ වසර 69.1ක කාලයක්. ඇමරිකාවේදී මේ අගය ගැහැනු පාර්ශවය වසර 79.9ක්ද පිරිමි පාර්ශවය 74ක සාමාන්‍ය ආයු කාලයක්ද තිබෙනවා.
මේ සමීක්ෂණයට යොදාගත් රටවල් 224 අතුරින් පළමු ස්ථානය ගන්නේ මොනාකෝ රාජ්‍යයයි. ඉතාම කුඩා රටක් වන මෙහි ජීවත්වන්නෙ මිනිසුන් 37,731ක ප්‍ර‍මාණයක් බවයි සඳහන් වන්නේ (2015). මෙයිනුත් 30% මිලියනපතියන්. මෙහි ජීවත්වන පුද්ගලයෙකුගේ සාමාන්‍ය ආයු කාලය වසර 89.52ක්. පහත තිබෙන්නේ වැඩිම ආයු කාලය සහිත රටවල් 10යි.
- Monaco
- Japan
- Singapore
- Macau
- San Marino
- Iceland
- Hong Kong
- Andorra
- Switzerland
- Guernsey
පසුගිය වසර 15දී ලොව ජිවත්වන පුද්ගලයන්ගේ සාමානය ආයු කාලය වසර 5කින් පමණ වැඩිවී තිබෙනවා. එහෙත් අඩුම ආයු සාමාන්‍ය ආයු කාලයක් සහිත චැඩ් රාජ්‍යයේ මිනිසුන්ගේ සාමාන්‍ය වසර ප්‍ර‍මාණය වන්නේ අවුරුදු 49.81ක්. ලෝක සෞඛ්‍ය සංවිධානයට අනුව අප්‍රිකාවේ රටවල මිනිසුන්ගේ සාමාන්‍ය ආයු කාලය වසර 60ක්. පහත තිබෙන්නේ අඩුම සාමාන්‍ය ආයු කාලයක් තිබෙන රටවල් 10.
- Chad
- Guinea-Bissau
- Afghanistan
- Swaziland
- Namibia
- Central African Republic
- Somalia
- Gabon
- Zambia
- Lesotho
මේ ලැයිස්තුවේ ශ්‍රී ලංකාව තිබෙන්නේ 84වැනි ස්ථානයේ. සම්පූර්ණ ජනගහනය ගත්කල සාමාන්‍ය ආයු කාලය වසර 76.8ක්ද, පිරිමින් පමණක් ගත්කල 73.3ක්ද, ගැහැනු පාර්ශවයට වසර 80.4ක සාමාන්‍ය ආයු කාලයක්ද තිබෙනවා. මේ දර්ශකයේ ඉන්දියාවට හිමිවී තිබෙන්නේ 163වන ස්ථානය. ඒ සාමාන්‍ය ආයු කාලය වසර 68.5කට උරුමකම් කියමින්.
Discussion about this post