ප්‍ර‍ංශයේ ප්‍ර‍ධානතම ටොරන්ට් වෙබ් අඩවියක් වූ OMGTorrent වෙබ් අඩවියේ හිමිකරුවන්, පාළකයන් මෙන්ම ටොරන්ට් ඩවුන්ලෝඩ් කරන ලද පරිශීලකයන් පිරිසක්ද එරට පොලිසිය විසින් අත්අඩංගුවට ගෙන තිබේ. මාස ගණනාවක පොලිස් විමර්ෂණවලින් පසුව අත්අඩංගුවට ගෙන නීතිය ඉදිරියට ඉදිරිපත් කර තිබේ. දස දහසකට අධික චිත්‍ර‍පටි සංඛ්‍යාවක් අදාල වෙබ් අඩවියේ තිබූ බවත්, 2008 වසරේ සිට ක්‍රියාත්මක වූ මේ වෙබ් අඩවියට මසකට මිලියන 3.5කට අධික පරිශීලකයන් සංඛ්‍යාවක් පිවිසෙන බවත් පොලිසිය වැඩිදුරටත් මාධ්‍යයට ප්‍ර‍කාශ කර තිබෙනවා. එමෙන්ම මෙය සම්පූර්ණයෙන්ම ලාභ ලබන ව්‍යාපෘතියක් වූ බවද ඔවුන් පවසා සිටිනවා.
මේක පිටිපස්සේ ඉන්න අය මේ කරන්නේ සමාජ සුභ සාධනයක්වත්, විනෝදය පිණිසවත් නෙවෙයි. ඔවුන් මේකෙන් අති විශාල ධනස්කන්ධයක් උපයනවා. ඔවුන් මේ චිත්‍ර‍පටි ලබාදෙන්නේ නොමිලේ වුනත්, විවිධාකාරයේ දැන්වීම් මඟින් ඔවුන් රිසි ලෙස මුදල් උපයාගන්නවා. පොලිස් ප්‍ර‍කාශකයෙකු එලෙස පැවසුවා.
සැකකරුවන්ගේ නිවාස පරික්ෂා කිරීමේදී ටෙරාබයිට් 3.5කට අධික අලුත්ම චිත්‍ර‍පටි රැසක්ද, පරිඝනක උපාංග මෙන්ම ප්‍ර‍ංශයෙන් එපිට තිබෙන තවත් එවැනිම දහස් ගණනක් චිත්‍ර‍පටි ඇති පරිඝනක ජාලයක්ද සොයාගැනීමට හැකියාව ලැබී තිබෙනවා. එවගේම ඔවුන් එතැනින් නොනැවතී වෙබ් අඩවියේ වැඩිම ඩවුන්ලෝඩ් ප්‍ර‍මාණයක් සිදුකරන ලද පරිශීලකයන් 4 දෙනෙකුද අත්අඩංගුවට ගෙන තිබෙනවා.
OMGTorrent වෙබ් අඩවියේ හිමිකරුවන 28 හැවිරිදි පුද්ගලයාට වසරක සිර දඬුවමක්ද, අනවසරයෙන් චිත්‍ර‍පටි බෙදාහැරීමට යූරෝ මිලියන 5ක වන්දියක්ද, එනම් රුපියල් කෝටි 17කට ආසන්න මුදලක් ගෙවීමට සිදුව තිබෙනවා. වෙබ් අඩවියේ තවත් පාලකයෙකු ලෙස කටයුතු කල 38 හැවිරිදි කාන්තාවකට මාස හතරක අත්හිටවූ සිරදඬුවමක්ද පැමිණිලිකරුවන්ට අලාභයද ගෙවීමට අණ කර තිබෙනවා. පෙර සඳහන් කල වැඩිම ඩවුන්ලෝඩ් ප්‍ර‍මාණයක් සිදුකල පුද්ගලයන් 4 දෙනාටද මසක කාලය බැගින් සිරදඬුවම්ද, අදාල චිත්‍ර‍පටි හිමිකරුවන් පවසන වන්දියද ගෙවීමට සිදුවෙනවා.
විමර්ෂණ සිදුකල කණ්ඩායමට අනුව මෙමඟින් සිදුවූ පාඩුව යූරෝ මිලියන 20 ඉක්මවනවා. හිමිකරුවන් නැතිවීමෙන් අනතුරුව OMGTorrent වෙබ් අඩවියේ හිමිකාරීත්වය හඳුනා නොගත් තුන්වැනි පාර්ශවයක් අතටගෙන තිබෙන අතර මේ වන විටත් වෙබ් අඩවිය පෙර ලෙසම වැඩ කරනවා.
Discussion about this post